Kjære Vindafjord (og andre). Me er ei foreldregruppe som arbeider for å etablere ein friskule i Vindafjord, basert på montessoripedagogikken. Vårt mål er å sikre eit variert opplæringstilbod og pedagogisk mangfald, slik at foreldra får større valfridom i valet av skule for borna sine. Søknaden vår er no til handsaming hjå Utdanningsdirektoratet, og politikarane i Vindafjord vil få høve til å uttale seg i løpet av den neste månaden. Me håpar at de ser verdien av dette initiativet.
Montessoripedagogikken er ein internasjonalt anerkjent pedagogisk retning som har vore brukt i over 100 år og finst i skular over heile verda. I Noreg er kvar tredje private grunnskule ein montessoriskule, noko som viser at denne pedagogikken er eit populært alternativ for mange familiar. Montessoriskulen følgjer den same overordna læreplanen som offentlege skular og gir elevane eit solid grunnlag for vidare skulegang og studiar. Forskjellen ligg i undervisningsmetodane.
• Individuell progresjon: Elevane får moglegheit til å fordjupe seg i fag i eige tempo, noko som kan styrkje både meistringskjensla og læringsgleda.
• Praktisk læring: I tillegg til tradisjonelle lærebøker nyttar montessoriskular konkret materiell og praktiske oppgåver for å styrkje forståinga av fagstoff.
• Aldersblanda grupper: I staden for klasser inndelte etter fødselsår, jobbar elevane saman i aldersblanda grupper, noko som fremjar samarbeid, ansvarskjensle og sosial læring.
• Lærarrolla: Læraren fungerer meir som ein rettleiar enn ein tradisjonell undervisar, noko som styrkjer elevane si evne til sjølvstendig problemløysing.
Montessoripedagogikken er livssynsnøytral og inkluderande. Pedagogikken fremjar sjølvstende, meistring og læringsglede, og passar godt for born med ulike læringsbehov. Skulen vil vere open for alle som ønskjer eit alternativt opplæringstilbod.
Ein montessoriskule i Vindafjord vil ikkje innebere auka utgifter for kommunen. Skulen vert finansiert direkte gjennom statlege tilskot, som dekkjer driftskostnadene på same måte som for offentlege skular. Me ser allereie no at eit utvida skuletilbod kan vere ein faktor som gjer Vindafjord meir attraktiv for nye innbyggjarar. Me har fått fleire henvendingar frå potensielle heimflyttarar og andre frå Etne, Tysvær, Karmøy, Oslo, Bergen og Stavanger som vurderer å flytte til kommunen dersom skulen vert etablert.
Blant dei som har vist interesse for å busetje seg i Vindafjord grunna skulen, finn me blant anna pedagogar, helsearbeidarar og nøkkelpersonell for private bedrifter – yrkesgrupper som er avgjerande for kommunen si utvikling. Ei auka tilflytting vil ikkje berre sikre viktig arbeidskraft, men som ein bonus òg gi høgare skatteinntekter og rammeoverføringar til kommunen.
Så langt har rundt 40 born i alderen 1–12 år meldt si interesse for skulen, før me har informert breitt. I utgangspunktet planlegg styret å drive ca. 25 skuleplassar 1.-7. kl. frå hausten 2026. Me håpar at politikarane og innbyggjarane i Vindafjord ser kor viktig det er i 2025 å tilby eit mangfaldig skulelandskap.
Ein montessoriskule vil bidra til pedagogisk variasjon, gi fleire valmoglegheiter for familiar og samtidig gjere kommunen meir attraktiv for tilflytting – noko som kan kome både næringslivet og kommunale tenester til gode. Nysgjerrig? Les meir på nettsida vår: vindafjordmontessori.no Følg gjerne og arbeidet vårt framover på den nyoppretta facebooksida vår: Vindafjord Montessori
Styret i Vindafjord Montessoriskule
Thomas Alvseike, Rannveig Hetland, Unn Vølstad og Marianne Cederløv.